Dırnaqlar yalnız estetik görünüşümüzün bir hissəsi deyil, eyni zamanda orqanizmdə baş verən bəzi dəyişikliklər haqqında məlumat verir Buna görə də onların düzgün qulluq edilməsi vacibdir. Dermatoloqlar bildirirlər ki, sadə gündəlik vərdişlər dırnaqların qırılmasının, soyulmasının və müxtəlif infeksiyaların qarşısını almağa kömək edə bilər.

XeberPlus.com mövzu ilə bağlı araşdırmanı təqdim edir:

Dırnaqları çox uzun saxlamaq əvəzinə mütəmadi olaraq kəsmək məsləhətdir. Əl dırnaqları demək olar ki, düz formada kəsilməli, kənarları isə pilka ilə yüngülcə hamarlanmalıdır. Ayaq dırnaqlarını isə düz kəsmək batıq dırnaq riskini azaltmağa kömək edir. Pilkanı dırnağın üzərində irəli-geri hərəkət etdirməkdənsə, eyni istiqamətdə istifadə etmək daha yğundur.

Dırnaqların uzun müddət suda qalması da onların zəifləməsinə səbəb ola bilər. Xüsusilə qab yuyarkən və təmizlik vasitələrindən istifadə edərkən əlcək taxmaq tövsiyə olunur. Əlləri yuduqdan sonra dırnaqları və ətrafındakı dərini nəmləndirmək onların qurumasının və asanlıqla çatlamasının qarşısını almağa kömək edir.

Dırnaq ətrafındakı dərini, yəni kutikulanı kəsmək və ya zorla geri itələmək də düzgün hesab edilmir. Kutikula dırnağın dibini qoruyur və onun zədələnməsi bakteriya və digər mikroorqanizmlərin daxil olmasını asanlaşdıra bilər. Həmçinin dırnaqları dişləmək, onların altını iti əşyalarla təmizləmək və dırnaqları gündəlik işlərdə alət kimi istifadə etməkdən çəkinmək lazımdır.

Manikür və gel lakdan istifadə edənlər də müəyyən məqamlara diqqət etməlidirlər. Dermatoloqlar gel manikürünün təkrar və uzunmüddətli istifadəsinin dırnaqlarda kövrəklik, soyulma və çatlama yarada biləcəyini bildirirlər. Buna görə dırnaqlara vaxtaşırı fasilə vermək, manikür zamanı istifadə olunan alətlərin steril olduğuna əmin olmaq və kutikulanın kəsilməsinə imkan verməmək məsləhətdir.

Qidalanma da dırnaq sağlamlığında rol oynaya bilər. Bununla yanaşı, dırnağın rənginin, formasının və ya quruluşunun səbəbsiz dəyişməsi yalnız vitamin çatışmazlığı ilə əlaqələndirilməməlidir. Məsələn, dırnağın saralması, qalınlaşması, qopmağa başlaması, ətrafındakı dərinin qızarması və şişməsi infeksiya və ya başqa sağlamlıq problemi ilə əlaqəli ola bilər. Belə dəyişikliklər davamlı olduqda dermatoloqa müraciət etmək lazımdır.

Sağlam dırnaqlar üçün əsas prinsip mürəkkəb prosedurlardan çox, düzgün qulluqdur. Dırnaqları təmiz saxlamaq, vaxtında kəsmək, nəmləndirmək, zədələnmədən qorumaq onların sağlamlığını qorumağın ən sadə yollarındandır.