ABŞ-ın Florida ştatındakı Everqleyds bataqlığında yerli yırtıcılar Burma pitonlarını ovlamağa başlayıb. Bir vaşağın piton yuvasındakı 42 yumurtanı məhv etməsi isə alimlərin diqqətini çəkib.

XeberPlus.com xəbər verir ki, Cənub-Şərqi Asiya mənşəli Burma pitonları Floridada təbii mühitə yayılaraq yerli heyvanların sayına ciddi təsir göstərib. Nəhəng ilanlar dovşan, yenot və maral kimi heyvanları ovlayaraq bölgənin ekoloji tarazlığını pozub.

2012-ci ildə yayımlanan araşdırmaya görə, pitonların yayıldığı ərazilərdə yenotların müşahidə sayı 99,3 faiz, ağquyruq maralların müşahidə sayı isə təxminən 94 faiz azalıb.

Lakin son araşdırmalar göstərir ki, pitonların özləri də yerli yırtıcıların hədəfinə çevrilir. Amerika timsahları, su mokasinləri və bəzi məməlilər gənc pitonları ovlaya bilir. Hətta bir vaşağın təxminən 3 metr uzunluğunda yetkin Burma pitonunu öldürdüyü də qeydə alınıb.

Ən diqqətçəkən hadisələrdən biri 2021-ci ilin iyununda baş verib. Alimlərin kamerası bir vaşağın piton yuvasına dəfələrlə qayıdaraq hücum etdiyini qeydə alıb. Sonradan aparılan yoxlama nəticəsində yuvadakı 42 yumurtanın məhv edildiyi müəyyənləşib.

Bununla belə, alimlər yerli yırtıcıların pitonları ovlamasının onların ümumi sayını azaltmaq üçün kifayət edib-etməyəcəyinin hələ məlum olmadığını bildirirlər. Floridada invaziv ilanlarla mübarizə üçün müxtəlif texnologiyalardan və izləmə üsullarından da istifadə olunur.