Smart televizorlarla bağlı yeni araşdırma ciddi məxfilik suallarını gündəmə gətirib. İddialara görə, bəzi televizor tətbiqlərinə yerləşdirilən xüsusi proqram təminatları istifadəçilərin internet bağlantısını məlumat toplama şəbəkəsinin bir hissəsinə çevirə bilər.

XeberPlus.com xeber verir ki, araşdırmada İsrail mərkəzli Bright Data şirkətinə aid proqramların LG və Samsung televizorları üçün hazırlanmış yüzlərlə tətbiqdə aşkar edildiyi bildirilib. Bu proqramlar vasitəsilə istifadəçilərin internet bağlantısı və IP ünvanları şirkətin müştərilərinə təqdim edilə bilər.

Mütəxəssislərin fikrincə, belə sistemlərdə internet sorğuları adi məlumat mərkəzlərindən deyil, real ev istifadəçilərinin bağlantılarından gəlirmiş kimi görünür. Bu isə bəzi internet məhdudiyyətlərini keçmək və böyük həcmdə məlumat toplamaq üçün istifadə oluna bilər.

Təhlükəsizlik şirkəti Spur Intelligence LG-nin webOS və Samsung-un Tizen platformalarındakı 6 mindən çox tətbiqi araşdırıb.

Araşdırmaya görə, tətbiqlərin təxminən üçdə birində “rezident proxy” funksiyası yaradan proqramlar aşkarlanıb. Bəzi hallarda sadə oyun, ekran qoruyucu və ya saat tətbiqlərinin arxa planda bu sistemlərə qoşulduğu qeyd olunub.

Bildirilib ki, bəzi tətbiqlər istifadəçiyə reklam izləmək əvəzinə internet bağlantısını paylaşmaq seçimi təqdim edir. Lakin araşdırmaçılar bu razılığın istifadəçilərə tam aydın izah edilmədiyini vurğulayırlar.

Araşdırmaya əsasən, istifadəçi razılıq verdikdən sonra bəzi proxy xidmətləri tətbiq bağlansa belə arxa planda fəaliyyət göstərə bilər.

Bundan əlavə, LG televizorları ilə bağlı başqa bir araşdırmada cihazların qoşulduğu şəbəkədəki digər avadanlıqları müəyyən etməyə çalışdığı və HDMI vasitəsilə göstərilən məzmunları analiz edə bildiyi iddia olunub.

Bright Data isə sistemin yalnız istifadəçinin açıq razılığı ilə işlədiyini və bağlantıların ictimai internet məlumatlarının toplanması məqsədilə istifadə edildiyini bildirib.