ABŞ-nin “Sceye” şirkəti mobil rabitə sahəsində diqqətçəkən sınaq həyata keçirib. Şirkətin hazırladığı uçan baza stansiyası ABŞ-dən Yaponiyaya gedərək geri qayıdıb və ümumilikdə 30 min kilometrdən çox məsafə qət edib.

XeberPlus.com xəbər verir ki, “Sceye SE2” adlı hava aparatı 30 gün davam edən sınaq uçuşu zamanı təxminən 17 kilometr yüksəklikdə fəaliyyət göstərib. Aparatın əsas məqsədi mobil rabitənin zəif olduğu və ya ümumiyyətlə mövcud olmadığı ərazilərdə əlaqə yaratmaqdır.

Yaponiyanın “SoftBank” mobil operatoru ilə birgə keçirilən sınaqlarda adi smartfonlarla zəng etmək, mesaj göndərmək və internet üzərindən video izləmək mümkün olub. Bunun üçün telefonlara əlavə avadanlıq quraşdırılmasına ehtiyac yaranmayıb.

Şirkətin məlumatına görə, gələcəkdə tam gücü ilə işləyəcək belə bir uçan platforma əhatə dairəsinə görə təxminən 500 yerüstü baza stansiyasını əvəz edə bilər. Bu texnologiyanın xüsusilə dağlıq ərazilərdə, dənizlərdə və təbii fəlakətlər zamanı faydalı olacağı gözlənilir.

“Sceye SE2” günəş panelləri vasitəsilə enerji toplayır və onu xüsusi batareyalarda saxlayır. Bu sistem hava aparatının uzun müddət yerə enmədən fəaliyyət göstərməsinə imkan verir.

Texnologiya “Starlink” peyk internetindən də fərqlənir. “Starlink” peykləri Yer səthindən yüzlərlə kilometr yüksəklikdə yerləşdiyi halda, “Sceye” platforması atmosferin təxminən 17 kilometr hündürlüyündə işləyir. Bu isə müəyyən şəraitdə daha az gecikmə ilə mobil bağlantı təmin edə bilər.

Sınağın uğurla tamamlanması gələcəkdə mobil rabitənin yalnız yerüstü qüllələr və peyklər vasitəsilə deyil, göydə fəaliyyət göstərən platformalarla da təmin olunması istiqamətində mühüm addım hesab edilir.