Yəmənin Şəbvə vilayətində hərbi təlim düşərgəsinə ballistik raketlərlə hücum nəticəsində azı 58 nəfər həyatını itirib, 200-dən çox insan yaralanıb. Yaralıların bir qisminin vəziyyətinin ağır olduğu bildirilir.

XeberPlus.com xəbər verir ki, hücum İranın dəstəklədiyi husilər tərəfindən, Ətəq şəhəri yaxınlığında yerləşən və hökumət qüvvələrinin nəzarətində olan hərbi düşərgəyə təşkil edilib. Məlumata görə, əraziyə üç ballistik raket atılıb.

Şəbvə Valiliyinin açıqlamasına əsasən, hadisədən sonra aparılan araşdırmalar nəticəsində ölənlərin sayı 58-ə yüksəlib. Yaralıların bəzilərinin vəziyyəti kritik olduğundan, itkilərin artacağı istisna edilmir.

Hücum zamanı hərbi təlim keçən yeni əsgərlərin olduğu düşərgə hədəfə alınıb. İlk məlumatlarda 53 nəfərin öldüyü bildirilsə də, sonradan bu rəqəm artıb.

Yəməndə hökumət qüvvələri ilə husilər arasında qarşıdurma uzun illərdir davam edir. Husilər paytaxt Səna da daxil olmaqla ölkənin şimalındakı geniş ərazilərə nəzarət edir, hökumət qüvvələri isə ölkənin digər bölgələrində mövqelərini qorumağa çalışır.

Şəbvə vilayəti strateji mövqeyi və enerji ehtiyatları ilə əlaqədar Yəməndəki münaqişənin mühüm bölgələrindən biri hesab olunur. Hərbi düşərgəyə hücum isə ölkədə təhlükəsizlik vəziyyətinin yenidən gərginləşdiyini göstərir.