Birləşmiş Ərəb Əmirliklərinin Dubay şəhərində dəniz suyunu içməli suya çevirəcək nəhəng zavod inşa edilir. Layihə tam gücü ilə işlədikdə gündə təxminən 818 milyon litr su istehsal edəcək.
XeberPlus.com xəbər verir ki, “Hassyan” adlanan layihə Dubayın Elektrik və Su İdarəsi tərəfindən həyata keçirilir. Təxminən 920 milyon dollara başa gələcək zavodun 2 milyon insanın içməli su ehtiyacını qarşılaması gözlənilir.
Müəssisədə dəniz suyu xüsusi membranlardan yüksək təzyiq altında keçirilərək duzdan və digər arzuolunmaz maddələrdən təmizlənəcək. Bu üsul suyun böyük həcmdə içməli suya çevrilməsinə imkan verir.
Layihənin diqqətçəkən xüsusiyyətlərindən biri də günəş enerjisindən istifadə edilməsidir. Bununla enerji sərfiyyatının və karbon emissiyalarının azaldılması hədəflənir.
Zavodun tikintisinin 2027-ci ilin ilk rübündə tamamlanması planlaşdırılır. Layihənin Dubayda artan su tələbatının ödənilməsinə və su ehtiyatlarının daha etibarlı təminatına töhfə verəcəyi gözlənilir.
