Süni intellekt şirkəti Anthropic yayımladığı yeni hesabatla texnologiyanın təhlükəli məqsədlər üçün istifadə olunması ilə bağlı ciddi narahatlıq yaradıb.

Şirkət bildirib ki, bəzi şəxslər süni intellekt modellərindən bioloji silahların hazırlanmasına kömək edə biləcək məlumatlar əldə etmək üçün istifadə etməyə çalışıblar.

Anthropic-in məlumatına görə, ən böyük risklərdən biri gələcəkdə daha güclü süni intellekt sistemlərinin viruslar və digər bioloji təhlükələrlə bağlı araşdırmalarda yanlış məqsədlərlə istifadə olunmasıdır.

Şirkət bu il Claude adlı süni intellekt modelindən istifadə edən bəzi şübhəli fəaliyyətləri aşkar etdiyini və həmin hesabların girişini məhdudlaşdırdığını açıqlayıb. Lakin araşdırmaların kimlər tərəfindən aparıldığı barədə ətraflı məlumat verilməyib.

Maraqlısı odur ki, təhlükəli niyyətləri müəyyən etmək həmişə asan olmur. Çünki bəzi hallarda zərərli məqsədlər adi elmi araşdırma görüntüsü altında gizlənə bilər.

Anthropic-in hesabatında süni intellektin yalnız bioloji sahədə deyil, həmçinin saxta məlumat yayılması, kiber əməliyyatlar və silah texnologiyalarının inkişafı kimi sahələrdə də sui-istifadə edilə biləcəyi qeyd olunub.

Ekspertlər bildirirlər ki, süni intellektin gələcəyi artıq təkcə “nə edə bilər?” sualı ilə deyil, “bu gücü kim və necə istifadə edəcək?” sualı ilə müəyyən olunacaq.