D vitamini sağlamlıq üçün vacib maddələrdən biri olsa da, həkim nəzarəti olmadan yüksək dozada qəbul edilməsi təhlükəli nəticələr yarada bilər. Mütəxəssislər bildirirlər ki, D vitamini “möcüzəvi dərman” deyil və yalnız ehtiyac olduqda düzgün dozada istifadə edilməlidir.

D vitamini bədəndə kalsium və fosfor balansının qorunmasına, sümüklərin və dişlərin möhkəmlənməsinə, əzələlərin normal fəaliyyətinə və immun sisteminin dəstəklənməsinə kömək edir. Lakin həddindən artıq qəbul edildikdə orqanizmdə zəhərlənmə təsiri yarada bilər.

Mütəxəssislər xəbərdarlıq edir: D vitamini faydalıdır, amma artıq doza sağlamlıq üçün təhlükəyə çevrilə bilər.

Mütəxəssislərin sözlərinə görə, yüksək dozada D vitamini istifadəsi qanda kalsium səviyyəsinin artmasına, böyrək daşlarının yaranmasına və böyrək zədələnməsinə səbəb ola bilər. Bu səbəbdən vitamin əlavələri qəbul etməzdən əvvəl analizlərlə D vitamini səviyyəsi yoxlanılmalı və müalicə fərdi şəkildə planlaşdırılmalıdır.

Həkimlər xüsusilə internetdən və ya tanış məsləhəti ilə uzun müddət yüksək dozalı D vitamini qəbul etməməyi tövsiyə edir. Sağlam D vitamini səviyyəsinə çatmağın ən düzgün yolu balanslı qidalanma, kifayət qədər günəş işığı və lazım olduqda həkim məsləhəti ilə əlavələrdən istifadə etməkdir.

Mənbə: Haberturk