Almaniyanın Bonn Universitetinin alimləri 101 yaşına qədər olan insanlardan götürülmüş qan hüceyrələrini laboratoriyada gənc beyin kök hüceyrələrinə çevirməyə nail olublar. Araşdırma zamanı hüceyrələrin bioloji yaş göstəricilərinin əhəmiyyətli dərəcədə azaldığı müəyyən edilib.

XeberPlus.com xəbər verir ki, tədqiqatın nəticələri “Aging Cell” elmi jurnalında dərc olunub. Alimlər hüceyrələri əvvəlcə embrional kök hüceyrə mərhələsinə qaytarmadan birbaşa sinir kök hüceyrələrinə çevirmək üçün yeni üsuldan istifadə ediblər.

Araşdırmanın ən maraqlı nəticəsi dəyişikliklərin təxminən 50 gün ərzində tədricən baş verməsidir. Bəzi hüceyrələrdə yaşlanma ilə əlaqəli epigenetik göstəricilər donorların əvvəlki yaşına nisbətən 5 faizə qədər azalıb.

Tədqiqatda yeni doğulmuş körpələrdən tutmuş 101 yaşlı insanlara qədər 15 donorun hüceyrələri araşdırılıb. Nəticələr yaşlı insanlardan götürülən hüceyrələrin də laboratoriya şəraitində yenidən proqramlaşdırılaraq gənc xüsusiyyətlər qazana biləcəyini göstərib.

Alimlər hesab edirlər ki, bu üsul gələcəkdə Alzheimer və Parkinson kimi neyrodegenerativ xəstəliklərin öyrənilməsinə kömək edə bilər. Bununla belə, araşdırma hələ laboratoriya mərhələsindədir və insanları cavanlaşdıran hazır müalicə üsulu demək deyil.