Elm adamları insan beynini kompüterə bağlayan yeni texnologiya ilə tibbdə böyük bir addım atıb. Hazırlanan beyin implantı sayəsində fəlc keçirən və danışıq qabiliyyətini itirən insanlar rəqəmsal görüntü vasitəsilə özlərini ifadə edə biləcəklər.

ABŞ-da aparılan araşdırmada alimlər beyin siqnallarını oxuyan xüsusi implant və süni intellekt dəstəyi ilə xəstələrin düşündüyü sözləri və etmək istədikləri jestləri kompüter ekranına köçürməyə nail olublar.

Yeni sistem istifadəçinin yalnız danışmasına deyil, həm də başını tərpətmək, jestlər etmək və emosiyalarını göstərmək kimi ünsiyyət formalarını geri qaytarmağa imkan verə bilər.

Araşdırmanın müəllifi Samantha Brosler bildirib ki, məqsəd təkcə sözləri bərpa etmək deyil, insanlara daha təbii ünsiyyət imkanları yaratmaqdır. Onun sözlərinə görə, jestlər insan danışığında məna, vurğu və emosiyanın vacib hissəsidir.

Mütəxəssislər hesab edir ki, bu texnologiya gələcəkdə ALS xəstələri, ağır iflic keçirənlər və danışıq qabiliyyətini itirən insanlar üçün böyük ümid mənbəyi ola bilər.

Alimlərin fikrincə, beyin və süni intellekt arasındakı bu əlaqə gələcəkdə insanlara itirdikləri bacarıqları yenidən qazandıran ən mühüm tibbi texnologiyalardan birinə çevrilə bilər.