Süni intellektin gələcəyi ilə bağlı narahatlıqlara daha biri əlavə olunub. Google DeepMind tədqiqatçısı Bilal Chughtai, süni intellektin düzgün idarə olunmadığı halda bəşəriyyət üçün böyük təhlükə yarada biləcəyini deyərək şirkətdən ayrıldığını açıqlayıb.
Chughtai bildirib ki, süni ümumi intellekt (AGI) üzərində işləyərkən texnologiyanın inkişaf istiqamətini yaxından izləyib və hazırkı sürətdən ciddi narahatlıq keçirir. Onun sözlərinə görə, gələcəkdə insan səviyyəsindən daha güclü sistemlər yarana bilər və bunların təhlükəsiz idarə olunması əsas məsələdir.
Bu, son günlərdə süni intellekt sahəsində çalışan mütəxəssislərdən gələn ilk xəbərdarlıq deyil. Daha əvvəl Anthropic əməkdaşı Jacob Coxon da super ağıllı süni intellekt yarışının insanlıq üçün risk yarada biləcəyini bildirərək istefa vermişdi.
Anthropic-in rəhbəri Dario Amodei, OpenAI rəhbəri Sam Altman və Elon Musk da ən güclü süni intellekt sistemlərinin təhlükəsizliyi üçün daha ehtiyatlı yanaşmanın vacibliyini vurğulayıblar.
Mütəxəssislər bildirirlər ki, əsas sual artıq “süni intellekt nə edə bilər?” deyil, “insanlar bu güclü texnologiyanı necə nəzarətdə saxlaya biləcək?” sualıdır.
