ABŞ-da yerləşən Sent-Luis Vaşinqton Universitetinin Tibb Fakültəsinin alimləri insan bədənində əvvəllər məlum olmayan, orqanabənzər yeni bir hissə aşkar ediblər. Araşdırmaya görə, o kəllə sümüyünün iliyində yerləşir və beynin immun müdafiəsində mühüm rol oynaya bilər.

Tədqiqatçılar müəyyən ediblər ki, kəllə sümüyü iliyində beyinə xüsusi aid immun hüceyrələrinin “hazırlandığı” mərkəzlər mövcuddur. Bu strukturlar beynə yönələn təhlükələrə qarşı bir növ “təhlükəsizlik mərkəzi” kimi fəaliyyət göstərə bilər.

Araşdırmanın ən diqqətçəkən hissəsi isə ölümcül beyin şişi olan qlioblastoma üzərində aparılan sınaqlardır. Alimlər bildiriblər ki, bu immun mərkəzləri gücləndirilən siçanlarda şişə qarşı daha güclü immun cavab yaranıb və onların yaşama müddəti uzanıb.

Tədqiqatın rəhbəri professor Conatan Kipnis bildirib ki, bu kəşf kəllə sümüyü iliyinin yalnız qoruyucu dayaq olmadığını, həm də beyinə xüsusi immun reaksiyalarının idarə olunduğu yeni mərkəzlərə sahib olduğunu göstərir.

Alimlərin fikrincə, bu kəşf gələcəkdə beyin şişləri ilə yanaşı, Alzheymer və digər nevroloji xəstəliklərin müalicəsində yeni yanaşmaların yaranmasına səbəb ola bilər.

Mənbə: SonDakika.com