Yəmən sahilləri yaxınlığında Hindistan bayrağı altında üzən “MSV Faize Noore Oliya” yük gəmisi hücuma məruz qaldıqdan sonra batıb. Gəmidəki 14 heyət üzvünün hamısı xilas edilib.

Hadisə avqustun 4-də Qırmızı dənizin Yəmənə aid hissəsində, Hudeydə liman şəhərinin yaxınlığında baş verib. Hindistanın gəmiçilik naziri Sarbananda Sonoval gəminin naməlum mərminin zərbəsinə məruz qaldığını bildirib.Gəmidə 13 Hindistan vətəndaşı və bir Yəmən vətəndaşı olub. Yəmən Sahil Mühafizəsi və dəniz qüvvələrinin iştirakı ilə həyata keçirilən əməliyyat nəticəsində onların hamısı təhlükəsiz əraziyə çatdırılıb.

Hadisə nəticəsində insan itkisi barədə məlumat verilməyib.Yəmənin beynəlxalq səviyyədə tanınan hökuməti hücuma görə İranın dəstəklədiyi husiləri günahlandırıb. Bununla belə, hadisənin dəqiq şəraiti və hücumu həyata keçirən tərəflə bağlı müstəqil təsdiq hələ yoxdur.

Hindistan tərəfi gəmiyə edilən hücumu pisləyib. Hadisə Qırmızı dənizdə gəmiçiliyin təhlükəsizliyi ilə bağlı narahatlığın artdığı bir dövrdə baş verib.

Mənbə: Haberler.com