İran Prezidenti Məsud Pezeşkian televiziyada yayımlanan proqramda ölkə gündəmi və xarici siyasətlə bağlı mühüm açıqlamalar verib. Diplomatik proseslərə toxunan Pezeşkian bildirib ki, Tehran üzərinə götürdüyü öhdəliklərə yalnız qarşı tərəfin də eyni şəkildə hərəkət edəcəyi təqdirdə sadiq qalacaq. O, ABŞ administrasiyasına münasibətdə ehtiyatlı mövqe tutduqlarını vurğulayıb.

Pezeşkian Oman rəsmiləri ilə aparılan danışıqlar zamanı Hörmüz Boğazının razılaşdırılmış xəritə əsasında yenidən açılması ilə bağlı razılıq əldə edildiyini açıqlayıb. Onun sözlərinə görə, bu istiqamətdə hazırlanmış yol xəritəsi ölkənin ali lideri Müctəba Xameneiyə təqdim olunub. Prezident bildirib ki, plan İran İnqilab Keşikçiləri Korpusu, hərbi qüvvələr və danışıqlar heyəti tərəfindən də qəbul edilib.

İran Prezidenti Hörmüz Boğazının açılmasının İslamabad Memorandumunda razılaşdırılmış çərçivəyə uyğun olduğunu qeyd edib. O vurğulayıb ki, boğazın məhz bu plan əsasında açılması prosesi ardıcıl və qətiyyətlə həyata keçirilməlidir.

Pezeşkian iki ölkənin yenidən danışıqlar masasına qayıda biləcəyini də bildirib. Lakin onun sözlərinə görə, Tehranın atdığı addımlar qarşı tərəfin də qarşılıqlı və adekvat addımları ilə cavablandırılmalıdır.

İran lideri Hörmüz Boğazının açılması halında ABŞ-ın da üzərinə düşən öhdəlikləri yerinə yetirməli olduğunu deyib. Pezeşkian Vaşinqtondan dəniz blokadasını, neft və neft-kimya məhsullarına tətbiq olunan sanksiyaları aradan qaldırmasını, dondurulmuş İran aktivlərini azad etməsini və İsrailin Livandakı fəaliyyətlərini dayandırması üçün təzyiq göstərməsini gözlədiklərini açıqlayıb.

Pezeşkian həmçinin iyun ayında imzalanan memorandumun qüvvədə olduğu dövrdə İranın təxminən 90 milyon barel neft ixrac etdiyini xatırladıb.

Çıxışında regional diplomatiyaya da toxunan Pezeşkian ABŞ və İsrailin hücumu nəticəsində həlak olan keçmiş lider Əli Xameneinin prinsipləri əsasında qonşu ölkələrlə münasibətlərin daha da inkişaf etdirilməsinin vacibliyini vurğulayıb. O, bu istiqamətdə prosesin kifayət qədər yavaş irəlilədiyini bildirib.

İranın ətrafındakı ölkələrin böyük hissəsinin İslam dövlətləri olduğunu deyən Pezeşkian Türkiyə, Pakistan, Əfqanıstan, Səudiyyə Ərəbistanı, Birləşmiş Ərəb Əmirlikləri, Qətər, Oman, Misir, Azərbaycan və Türkmənistanla ortaq anlaşma mühitinin yaradılmasını hədəflədiklərini söyləyib.

İran Prezidenti regional təhlükəsizliyin yalnız dialoq və qarşılıqlı anlaşma yolu ilə təmin oluna biləcəyini qeyd edib.

Mənbə: dha.com