NASA-nın Marsda fəaliyyət göstərən Perseverance kəşfiyyat aparatı başqa planet səthində ən uzun məsafə qət edən kosmik vasitə rekordunu yeniləyib. Aparat 2021-ci ildən bu yana Mars səthində 45,22 kilometr yol gedərək yeni tarix yazıb.
XeberPlus.com xəbər verir ki, NASA-nın məlumatına görə, altı təkərli və avtomobil ölçüsündə olan Perseverance Marsda indiyədək ən uzun məsafə qət edən kəşfiyyat aparatı olub.
Perseverance bununla 2004–2018-ci illərdə Marsda fəaliyyət göstərən Opportunity aparatının 45,16 kilometrlik rekordunu geridə qoyub. Yeni rekord Perseverance-in missiyasının 2006-cı günündə qeydə alınıb.
NASA mütəxəssisləri bildirirlər ki, aparat ilkin planlaşdırılan məsafədən daha çox yol qət edib. Onun hərəkət sistemlərinin normal işləməsi gələcək illərdə daha böyük məsafələrə çatmağa imkan verə bilər.
Perseverance hazırda Marsın Jezero kraterində araşdırmalarını davam etdirir. Aparatın əsas məqsədlərindən biri planetdə keçmişdə həyat izlərinin olub-olmadığını araşdırmaq və elmi nümunələr toplamaqdır.
NASA-nın planına əsasən, Perseverance-in Marsdakı tədqiqat fəaliyyətlərinin 2028-ci ilin sonuna qədər davam etməsi gözlənilir. Alimlər aparatın gələcəkdə yeni rekordlara imza ata biləcəyini bildirirlər.
