Yəməndə İran dəstəkli Husilərin hücumlarını artırmasından sonra Səudiyyə Ərəbistanında təhlükəsizlik tədbirləri gücləndirilib. Ölkənin qərbində yerləşən Məkkə, Ciddə və Taif şəhərləri üçün qısa müddətli hücum xəbərdarlığı elan edilib.

Səudiyyə Mülki Müdafiə qurumu bölgələrdə “potensial təhlükə” olduğunu açıqlayıb. Xəbərdarlıqlar qısa müddət sonra ləğv edilsə də, bu hadisə diqqət çəkib.

Məkkədə verilən xəbərdarlığın xüsusilə əhəmiyyətli olduğu bildirilib. Çünki bu, Yəməndəki qarşıdurmaların başlamasından sonra müqəddəs şəhərdə verilən ilk hücum siqnalı kimi qiymətləndirilib.

Gərginlik Husilərin son günlər Səudiyyə Ərəbistanına qarşı raket və pilotsuz uçuş aparatı hücumlarını artırması fonunda baş verib. Əvvəlki hücumlarda 13 mülki şəxsin yaralandığı, bəzi ev və nəqliyyat vasitələrinə zərər dəydiyi bildirilib.

Ekspertlər hesab edir ki, bölgədəki qarşıdurmanın genişlənməsi yalnız Yəmən və Səudiyyə Ərəbistanına deyil, həm də Qırmızı dənizdə enerji və ticarət marşrutlarına təsir göstərə bilər.