Çinin robot texnologiyaları şirkəti Unitree insan əlinə yaxın ölçülərdə hazırladığı yeni robot əlini təqdim edib. Dex5-S adlı model daha dəqiq tutma və hərəkət imkanları ilə diqqət çəkir.

XeberPlus.com xəbər verir ki, yeni robot əl beş barmaqdan ibarətdir və insan əli ilə təxminən eyni ölçüdə hazırlanıb. Cihazın çəkisi 620 qramdır və əvvəlki modeldən daha yüngül olduğu bildirilir.

Dex5-S modeli 22 sərbəstlik dərəcəsinə malikdir. Bu xüsusiyyət robot barmaqlarının müxtəlif istiqamətlərdə daha çevik hərəkət etməsinə imkan verir. Sistem xaricdən təsir edən qüvvələrə qarşı da müəyyən elastiklik göstərə bilir.

Robot əlində zərbədən qorunma sistemi də mövcuddur. Şirkətin məlumatına görə, bu texnologiya daha təhlükəsiz və nəzarətli tutuş imkanları yaradır.

İnsan əlinin təxminən 27 sərbəstlik dərəcəsinə sahib olduğu nəzərə alınsa, Unitree-nin yeni modeli bu sahədə insan hərəkətlərinə yaxınlaşan texnologiyalardan biri hesab olunur.

Dex5-S əsasən tədqiqatçılar və robototexnika mütəxəssisləri üçün nəzərdə tutulub. Məhsulun ilkin qiyməti 6 500 dollar təşkil edir.

Mütəxəssislər hesab edir ki, belə robot əllər gələcəkdə insansı robotların inkişafında, zavodlarda, laboratoriyalarda və gündəlik işlərdə daha geniş istifadə oluna bilər.