“Google” şirkətinin tədqiqatçıları süni intellektin yeni məlumatları daha uzun müddət yadda saxlamasına imkan verən öyrənmə üsulu üzərində çalışırlar. İnsan beyninin yuxu zamanı məlumatları yaddaşda möhkəmləndirməsindən ilhamlanan sistem süni intellektin əvvəlki biliklərini itirmədən yeni məlumatlar öyrənməsini hədəfləyir.

XeberPlus.com xəbər verir ki, hazırda “ChatGPT”, “Gemini” və “Claude” kimi böyük dil modelləri istifadəçilərdən aldıqları məlumatları söhbət zamanı emal edə bilsələr də, bu məlumatlar avtomatik olaraq modelin ümumi biliklərinə əlavə edilmir.

Süni intellektə yeni biliklərin öyrədilməsi üçün adətən əlavə təlim tələb olunur. Lakin bu proses zamanı modelin əvvəlki bilik və bacarıqlarının bir hissəsini itirməsi mümkündür. Mütəxəssislər bu problemi “fəlakətli unutma” adlandırırlar.

“Google” tədqiqatçılarının təklif etdiyi yeni sistem süni intellektin fəaliyyətini iki mərhələyə bölür. Birinci mərhələdə model istifadəçilərlə qarşılıqlı əlaqə qurur və yeni məlumatları müvəqqəti yaddaşda saxlayır. İkinci, yəni “yuxu” mərhələsində isə həmin məlumatların daha qalıcı yaddaşa ötürülməsi nəzərdə tutulur.

Yeni yanaşmada “yuxu” zamanı süni intellektin özünün yaratdığı nümunələr üzərində məşq etməsi də planlaşdırılır. Tədqiqatçılar bu prosesi insanın yuxu zamanı öyrəndiklərini möhkəmləndirməsinə bənzədirlər.

Sistemin əsas xüsusiyyətlərindən biri yeni məlumatların saxlanılması üçün əlavə yaddaş modullarından istifadə olunmasıdır. Bununla süni intellektin əvvəlki biliklərinə mümkün qədər az müdaxilə edilərək yeni məlumatları mənimsəməsi hədəflənir.

Məlumatlar qalıcı yaddaşa ötürüldükdən sonra müvəqqəti yaddaşın təmizlənməsi nəzərdə tutulur. Bu üsul modelin növbəti istifadə mərhələsində yeni biliklər toplamağa davam etməsinə imkan verə bilər.

Tədqiqatçılar hesab edirlər ki, bu yanaşma gələcəkdə süni intellekt sistemlərinin davamlı öyrənməsinə kömək edə bilər. Bununla belə, texnologiya hələ tədqiqat mərhələsindədir və mövcud süni intellekt xidmətlərində geniş istifadəyə verilməyib.