ABŞ-ın Oklahoma ştatında baş verən hadisə cəmiyyətdə böyük sarsıntı yaradıb. İddiaya görə, iki yaşlı Locklyn McGuire adlı qız uşağı evdə kilidli saxlanıldığı otaqda Pitbull hücumuna məruz qalaraq həyatını itirib.
Hadisədən sonra uşağın anası Darci Lambert və atası Jorden McGuire barəsində cinayət işi açılıb. Valideynlərə qətl və heyvana qarşı amansız rəftar ittihamları irəli sürülüb.
Araşdırmaya görə, cütlük uşağı otaqda saxlayıb və eyni otağa Pitbull də buraxıb. İddialara əsasən, itin daha əvvəl də uşağa xəsarət yetirdiyi və sağlam vəziyyətdə olmadığı müəyyən edilib.
Uşağın vəziyyətini yoxlamaq üçün otağa daxil olan ata qızını hərəkətsiz vəziyyətdə tapıb və təcili yardım çağırıb. Lakin hadisə yerinə gələn şəxslər uşağın həyatını xilas edə bilməyib.
Polis bildirib ki, valideynlər uşağın təhlükəsizliyi üçün məsuliyyət daşıyırdılar və məlum risklərə baxmayaraq lazımi tədbirləri görməyiblər.
Dəhşətli hadisədən sonra azyaşlı qızın ailəsi ilə bağlı məhkəmə prosesi davam edir. Bu arada uşağın dəfn xərclərini qarşılamaq məqsədilə başladılan yardım kampaniyası qısa müddətdə geniş dəstək toplayıb.
