Apple oktyabr ayında bir neçə yeni məhsulunu təqdim etməyə hazırlaşır. Şirkətin yeni ağıllı ev cihazı, yenilənmiş HomePod mini və yeni Apple TV modelini 13 oktyabrda nümayiş etdirəcəyi bildirilir.
XeberPlus.com xəbər verir ki, Bloomberg jurnalisti Mark Gurmanın məlumatına görə, Apple bununla kifayətlənməyəcək. Şirkətin 27 oktyabrda daha böyük təqdimat keçirməsi və yeni nəsil cihazlarını göstərməsi gözlənilir.
Təqdimatda uzun müddətdir haqqında məlumat yayılan OLED ekranlı MacBook Pro, OLED ekranlı iPad mini, həmçinin M6 prosessorlu 14 düymlük MacBook Pro və M6 çipli iMac modellərinin təqdim ediləcəyi iddia olunur.
Yeni məhsullar arasında ən çox diqqət çəkən yeniliklərdən biri OLED ekranlı MacBook Pro ola bilər. Bu texnologiyanın daha yüksək görüntü keyfiyyəti, daha dərin qara rənglər və daha yaxşı enerji səmərəliliyi təqdim edəcəyi gözlənilir.
