Rusiyanın İrkutsk vilayətində vəba araşdırmaları aparılan institutda çalışan əməkdaşın ölümündən sonra mümkün infeksiya yayılması ilə bağlı təhlükəsizlik tədbirləri gücləndirilib.

XeberPlus.com xəbər verir ki, hadisə İrkutsk Vəba Araşdırma İnstitutunda baş verib. 28 yaşlı laboratoriya əməkdaşı Darya Şipilovanın Şelehov şəhərindəki xəstəxanada həyatını itirdiyi bildirilib.

İlkin məlumatlara görə, qadına ölümündən əvvəl səbəbi müəyyən edilməyən pnevmoniya diaqnozu qoyulub. Lakin onun vəba araşdırmaları aparılan laboratoriyada çalışması bölgədə infeksiya ehtimalı ilə bağlı narahatlıq yaradıb.

Yerli mediada yayılan iddialara görə, laboratoriyada işləyərkən tərkibində Yersinia pestis bakteriyası olan sınaq borusunun təsadüfən qırıldığı və bundan sonra əməkdaşın vəziyyətinin pisləşdiyi bildirilib. Lakin təhlükəsizlik komissiyaları laboratoriyada patogenlərlə işləmə zamanı hər hansı qəza baş verdiyinə dair sübut tapılmadığını açıqlayıb.

Hadisədən sonra qadınla təmasda olmuş təxminən 200 nəfərin tibbi nəzarətə götürüldüyü, ehtiyat tədbirləri çərçivəsində isə 5 xəstəxananın bağlandığı bildirilib. İrkutsk vilayətinin rəhbərliyi mümkün infeksiya riskinə qarşı xüsusi toplantı keçirib.

Rusiya İstehlakçı Hüquqlarının Müdafiəsi və İnsan Rifahına Nəzarət Xidməti (Rospotrebnadzor) bölgədə epidemioloji vəziyyətin sabit olduğunu açıqlayıb.

Ümumdünya Səhiyyə Təşkilatının məlumatına görə, vəba Yersinia pestis bakteriyasının yaratdığı infeksiyadır. Xüsusilə ağciyər vəbası ağır keçə bilər və insandan insana tənəffüs yolu ilə yayıla bilər. Erkən diaqnoz və uyğun antibiotik müalicəsi ilə xəstəliyin qarşısını almaq mümkündür.