Səyahətə mövsümə uyğun getmək ən vacib nüanslardan biridir. Yayda sevərək seçdiyimiz ölkə payız üçün o qədər də uyğun olmaya bilər. Buna görə də seçim edərək istirahətə getmək önəmlidir. Xüsusən “yay tətilini harada keçirim?” sualı insanı daha çox düşündürən faktorlardan birinə çevrilir. Bəziləri yay mövsümündə payız tətili üçün ölkə seçimi edərkən, bəziləri də qış ayında isti ölkə axtarışına çıxır.

Bəs hansı mövsümdə harda tətil etmək ideal seçim ola bilər ?

XeberPlus.com mövzu ilə bağlı etdiyi araşdırmanı təqdim edir :

İtaliyaya səyahət üçün yaz ayları əlverişli seçimlərdən biridir. Səbəbi isə havanın adətən mülayim olmasıdır. Yayın güclü istisi və turist sıxlığı hələ başlamadığı üçün Roma, Florensiya və Venesiya kimi şəhərləri daha rahat gəzmək mümkündür. Tarixi abidələri və açıq hava məkanlarını kəşf etmək üçün də bu dövr əlverişlidir.

Yunanıstan xüsusilə yay aylarında dəniz istirahəti üçün seçilən ölkələrdəndir. Bu mövsümdə isti və günəşli hava çimərliklərdən və adalardan tam istifadə etməyə imkan verir. Santorini, Mikonos və Krit kimi istiqamətlərdə dəniz, günəş və ada atmosferindən zövq almaq mümkündür.

Yaponiya payız fəslində tamamilə fərqli görünür. Əsas səbəb ölkənin müxtəlif bölgələrində ərazinin payız ruhuna bürünməsidir. Xüsusilə Kyoto kimi şəhərlərdə bu mənzərə səyahətə xüsusi gözəllik qatır. Havanın yayla müqayisədə sərin olması da uzun şəhər gəzintilərini rahatlaşdırır.

Qışda İsveçrə qar mənzərələri və Alp dağları ilə diqqət çəkir. Bu fəsildə ölkə xizək və digər qış idman növləri üçün əlverişli şərait yaradır. Zermatt və St. Moritz kimi dağlıq ərazilər həm qış idmanı həvəskarları, həm də qarla örtülmüş mənzərələri görmək istəyənlər üçün maraqlıdır.

Fransanı, xüsusilə Parisi gəzmək üçün yazın sonu və yayın əvvəli rahat dövrlərdən hesab olunur. Çünki hava nə qışdakı kimi soyuq, nə də yayın ən isti günlərindəki kimi yorucu olur. Bu zaman Eyfel qülləsi, Luvr və şəhərin digər məşhur məkanlarını daha rahat şəkildə gəzmək mümkündür.

İsti iqlimə malik Birləşmiş Ərəb Əmirliklərinə payız və qış aylarında səyahət etmək daha rahat ola bilər. Səbəb yay aylarındakı yüksək temperatur və rütubətin azalmasıdır. Dubay və Əbu-Dabidə açıq havada gəzmək, şəhərin görməli yerlərini kəşf etmək və müxtəlif tədbirlərdə iştirak etmək bu dövrdə daha rahat olur.

Nəticə də, səyahət zamanı yalnız “hara gedim?” sualını deyil, “nə vaxt gedim?” sualını da nəzərə almaq lazımdır. Doğru mövsüm seçimi həm hava şəraitindən daha rahat yararlanmağa, həm də səfərdən daha çox zövq almağa kömək edir.