Apple-ın yeni modeli iPhone 17 Pro qeyri-adi dözümlülük testi ilə gündəmə gəlib. Telefon İsveçin şimalında təxminən 30,6 kilometr yüksəklikdən yerə buraxılıb və düşüşdən sonra işlək vəziyyətdə qalıb.
Test telefon qoruyucusunun istehsalçısı RhinoShield və aviasiya şirkəti Sent Into Space tərəfindən həyata keçirilib. Təcrübə zamanı iPhone 17 Pro yüksək hündürlük balonuna bağlanaraq 30 607 metr yüksəkliyə qaldırılıb və daha sonra sərbəst buraxılıb.
Telefon təxminən 25 dəqiqə havada qalıb. Düşüş zamanı temperaturun -60 dərəcəyə qədər endiyi bildirilib. Cihaz İsveçdə uzaq bir əraziyə düşdükdən sonra xarici görünüşündə ciddi zədə olmadığı müşahidə edilib.
Komanda telefonu tapmaq üçün 5 saatdan çox axtarış aparıb. Guinness nümayəndələrinin yoxlamasından sonra cihazın açıldığı, zəng etdiyi və foto çəkə bildiyi təsdiqlənib.
Bu sınaq “telefon qoruyucu ilə təbii əraziyə ən yüksəkdən həyata keçirilən düşüş testi” kateqoriyasında Guinness Dünya Rekordu kimi qeydə alınıb.
Mənbə:donanimhaber.com
