İspaniyada iki sərnişin qatarının toqquşması nəticəsində azı 68 nəfər həyatını itirib, 58 nəfər yaralanıb. Ağır qəza ölkənin Toledo şəhəri yaxınlığında baş verib.

XeberPlus.com xəbər verir ki, hadisə oktyabrın 28-də yerli vaxtla saat 08:54-də Los-Yebenes ərazisində qeydə alınıb. Madrid-Sevilya istiqamətində hərəkət edən “Renfe” şirkətinə məxsus sürətli qatar əks istiqamətdə hərəkət edən “Iryo” qatarı ilə toqquşub.

Toqquşmanın gücündən iki vaqon yamacdan aşağı aşıb. Qəza zamanı hər iki qatarda ümumilikdə 544 sərnişin olub. Hadisə yerinə xilasedicilər, polis, yanğınsöndürənlər və hərbi qüvvələr cəlb edilib.

Kastiliya-La-Mança bölgəsinin rəhbəri Emiliano Qarsiya-Paxe bildirib ki, ölənlərdən 40-ı “Iryo”, 24-ü isə “Renfe” qatarında olub. Digər ölənlərlə bağlı məlumatların dəqiqləşdirilməsi və axtarış-xilasetmə işləri davam etdirilir.

İlkin məlumatlara görə, qəza dəmir yolunun avtomatik təhlükəsizlik sistemində yaranan nasazlıqdan sonra baş verib. Bildirilib ki, qatarların hərəkəti idarəetmə mərkəzinin nəzarətinə keçdikdən sonra verilən yanlış icazə toqquşmaya səbəb olub. Hadisə ilə bağlı araşdırma aparılır.

Qəza nəticəsində Madrid və Əndəlüs arasında bəzi dəmir yolu reysləri müvəqqəti dayandırılıb. Toledo ətrafındakı xəstəxanalarda planlaşdırılmış əməliyyatlar təxirə salınıb və yaralıların müalicəsinə üstünlük verilib.

İspaniyanın Baş naziri Pedro Sançes hadisə ilə əlaqədar ölkədə üç günlük matəm elan olunduğunu bildirib. O, qəzanın səbəblərinin tam araşdırılacağını və mümkün səhlənkarlıq hallarının müəyyən ediləcəyini vurğulayıb.