Afrikanın Saxara səhrasında aşkar edilən meteorit Marsın milyardlarla il əvvəlki vəziyyəti haqqında yeni məlumatlar ortaya çıxarıb.

XeberPlus.com xəbər verir ki, 2022-ci ildə Malidə tapılan meteorit səkkiz hissədən ibarətdir və ümumi çəkisi 798,5 qramdır. Onun ən böyük parçasının çəkisi 442 qram, eni isə təxminən 10 santimetrdir.

Alimlər hesab edirlər ki, meteorit Marsa başqa bir səma cisminin çırpılması nəticəsində kosmosa atılıb və daha sonra Yerə düşüb. Aparılan araşdırmalar süxurun Qırmızı planetin ən qədim qabıq təbəqələrindən birinə aid olduğunu göstərir.

NASA-nın “Reaktiv Hərəkət” laboratoriyasından Yanq Liunun rəhbərlik etdiyi tədqiqat qrupu meteoritin yaşını müəyyənləşdirmək üçün müxtəlif elmi üsullardan istifadə edib. Süxurdakı sirkon kristallarının təhlili onun təxminən 4,11 milyard il yaşı olduğunu göstərib.

Araşdırmanın ən mühüm nəticələrindən biri Marsda qədim dövrlərdə suyun mövcudluğuna dair yeni izlərin aşkarlanmasıdır. Meteoritin tərkibindəki mineralların və oksigen izotoplarının təhlili süxurun bir vaxtlar su ilə təmasda olduğunu göstərir.

Tədqiqatçılar bildirirlər ki, bu tapıntı Marsın ilk dövrlərində suyun planetin qabıq təbəqələrində hərəkət etdiyini və müxtəlif süxurlarla qarşılıqlı təsirdə olduğunu göstərən mühüm sübutlardan biridir.