Cənubi Amerikanın qərbində yerləşən Peru həm qədim tarixi, həm də heyrətamiz təbiəti ilə dünyanın ən maraqlı ölkələrindən biridir. Sakit okean sahillərindən And dağlarına, oradan isə Amazon meşələrinə qədər uzanan ölkə fərqli coğrafi mənzərələri bir arada təqdim edir.
Peru deyəndə ilk ağıla gələn məkan, şübhəsiz ki, Machu Picchudur. And dağlarının zirvələri arasında yerləşən bu qədim İnka şəhəri dünyanın ən məşhur tarixi abidələrindən sayılır. Daş tikililəri, dağ mənzərəsi və əsrarəngiz atmosferi buranı turistlərin ən çox ziyarət etdiyi məkanlardan birinə çevirib.
Kusko da Perunun mütləq görülməli şəhərlərindəndir. Vaxtilə İnka imperiyasının paytaxtı olan şəhərdə qədim tikililərlə ispan memarlığının izləri bir arada görünür. Dar küçələri, tarixi meydanları və dağlarla əhatələnmiş mənzərəsi Kuskonu turistlər üçün xüsusi məkana çevirir.
Təbiət həvəskarları üçün isə Göy qurşağı dağı Vinikunka maraqlı seçimdir. Müxtəlif rənglərə çalan dağ yamacları uzaqdan sanki rənglərlə çəkilmiş mənzərəni xatırladır. Bu ərazi xüsusilə son illərdə Peruya səyahət edən turistlərin diqqətini cəlb edir.
Perunun başqa bir möhtəşəm tərəfi Amazon meşələridir. Ölkənin şərq hissəsində yerləşən Amazon hövzəsi zəngin canlı aləmi ilə seçilir. Burada tropik meşələr, çaylar və çoxsaylı heyvan növləri ilə tanış olmaq mümkündür.
Ölkənin paytaxtı Lima isə Perunun müasir simasını göstərir. Sakit okean sahilində yerləşən şəhərdə tarixi məhəllələrlə yanaşı, müasir restoranlar, muzeylər və sahil əraziləri də var. Xüsusilə Miraflores bölgəsi şəhəri gəzmək istəyən turistlərin məşhur ünvanlarından biridir.
Peruda görməli yerlər bununla bitmir. Huakaçina vahəsi səhranın ortasında yerləşən göl və xurma ağacları ilə fərqli mənzərə yaradır. Titikaka gölü isə dünyanın ən yüksəkdə yerləşən böyük göllərindən biri kimi tanınır və Peru ilə Boliviya arasında yerləşir.
Perunun mətbəxi də ölkənin maraqlı tərəflərindəndir. Qarğıdalı, kartof, dəniz məhsulları və müxtəlif ədviyyatlardan istifadə edilən yeməklər yerli mətbəxin əsas xüsusiyyətlərindəndir.
Qədim İnka mədəniyyəti, rəngarəng şəhərləri, yüksək dağları, səhraları və Amazon meşələri ilə Peru səyahət etmək istəyənlər üçün bir ölkədən daha çox, bir neçə fərqli dünyanın bir arada yaşandığı məkan təsiri bağışlayır.
