Film izləyərkən, dostlarla söhbət edərkən və ya sadəcə gün ərzində qəlyanaltı kimi bir çox insanın ilk seçimi çips olur. Xırt-xırt səsi, duzlu dadı və müxtəlif çeşidləri onu xüsusilə cəlbedici edir. Lakin kiçik bir paket kimi görünən bu məhsulun tərkibində orqanizm üçün arzuolunmaz hesab edilən kifayət qədər duz, yağ və kalori ola bilər.

Bəs çipsi niyə tez-tez yemək məsləhət görülmür?

XeberPlus.com xəbər verir ki, mütəxəssislər sağlam qidalanmada yüksək dərəcədə emal olunmuş, duz və yağ baxımından zəngin qəlyanaltıların məhdudlaşdırılmasını tövsiyə edirlər. Ümumdünya Səhiyyə Təşkilatı da sağlam qidalanmanın əsasını daha az emal olunmuş, natrium və zərərli yağları az olan məhsulların təşkil etməli olduğunu bildirir.

Çipsin dadını daha cəlbedici edən əsas komponentlərdən biri duzdur. Lakin çox miqdarda natrium qəbul etmək gündəlik ümumi duz yükünü artırır.

Problem ondadır ki, insan bəzən bir neçə çipslə kifayətlənmir. Paket qarşısında oturanda porsiyanın nə qədər olduğunu hiss etmədən yeməyə davam etmək asandır. Beləliklə, gün ərzində qəbul edilən duz və kalori gözləniləndən xeyli çox ola bilər.

Kartofun özü xeyirli məhsuldur. Lakin onun nazik dilimlərə bölünüb yüksək temperaturda qızardılması və duz, yağ və müxtəlif dadlandırıcılarla hazırlanması məhsulun qidanı dəyişir.

Çipslə bağlı diqqət çəkən başqa məqam isə akrilamiddir kimyəvi maddəsidir. Bu maddə kartof kimi nişastalı bitki mənşəli məhsulların yüksək temperaturda qızardılması, bişirilməsi və ya sobada hazırlanması zamanı yarana bilər.

Çipsin əsas xüsusiyyətlərindən biri onun dadının və teksturasının insanı daha çox yeməyə sövq edə bilməsidir. Duz, yağ və xırtıldayan quruluş birlikdə qəlyanaltını olduqca cəlbedici edir.

Üstəlik, paketdən birbaşa yemək ona nəzarəti çətinləşdirir. Buna görə çips yemək istəyirsinizsə, bütün paketi qarşınıza qoymaq əvəzinə kiçik bir hissə ayırmaq daha məqsədəuyğundur.