“OpenAI” şirkəti “ChatGPT” istifadəçiləri üçün yeni inteqrasiya imkanını istifadəyə verib. Yenilik sayəsində istifadəçilər “iCloud Mail” və “Apple Calendar” xidmətlərini birbaşa süni intellektə qoşa biləcəklər.

XeberPlus.com xəbər verir ki, yeni funksiya elektron məktubların və təqvim məlumatlarının “ChatGPT” üzərindən idarə olunmasına imkan yaradır. İstifadəçilər müxtəlif tətbiqlərə keçmədən məktublarını axtara, onların məzmununu ümumiləşdirə və planlaşdırılmış görüşlərini nəzərdən keçirə biləcəklər.

İnteqrasiya vasitəsilə elektron poçta daxil olan mesajları tapmaq, vacib məlumatları müəyyənləşdirmək və həftəlik görüşləri planlaşdırmaq daha asan olacaq. Bundan əlavə, lazımi icazələr verildikdə təqvimdəki tədbirləri yeniləmək də mümkün olacaq.

Yeni funksiyadan istifadə etmək üçün ödənişli “ChatGPT” abunəliyi tələb olunmur. Xidmətin veb versiyada, kompüter və iOS tətbiqlərində əlçatan olduğu bildirilir.

“iCloud” hesabını “ChatGPT”yə qoşmaq üçün əlavə təhlükəsizlik mərhələsindən keçmək lazımdır. “Apple” istifadəçilərdən əsas hesab şifrəsi əvəzinə tətbiq üçün ayrıca şifrə yaratmağı tələb edir. Bu üsul şəxsi hesab məlumatlarının qorunmasına xidmət edir.

Qoşulma tamamlandıqdan sonra “@icloud.com”, “@me.com” və “@mac.com” ünvanlı elektron poçt hesablarından istifadə etmək mümkün olacaq. İstifadəçi müvafiq icazələri verdikdən sonra “ChatGPT” məktublara və təqvim məlumatlarına çıxış əldə edə biləcək.

Yeni inteqrasiyanın əsas məqsədi gündəlik işləri sadələşdirmək, elektron yazışmaları və görüşlərin idarə olunmasını vahid platformada birləşdirməkdir.