Çexiyada avtomobil yolu layihəsi çərçivəsində aparılan araşdırmalarda min illər əvvələ aid Kelt yaşayış məntəqəsi və qiymətli xəzinə qalıqları tapılıb.

Qazıntılar zamanı yüzlərlə qızıl və gümüş Kelt sikkəsi, sikkə hazırlamaq üçün istifadə edilən qəliblər, kəhrəba bəzək əşyaları, qiymətli keramika nümunələri, qədim ev qalıqları və istehsal emalatxanaları aşkarlanıb.

Mütəxəssislərin məlumatına görə, tapıntılar təxminən e.ə. II əsrə aiddir. Ərazi qədim dövrdə Baltik dənizi ilə Aralıq dənizini birləşdirən mühüm Kəhrəba yolu üzərində yerləşən ticarət mərkəzi olub.

Arxeoloqlar hesab edirlər ki, bu kəşf Keltlərin həmin bölgədə yalnız yaşayış deyil, həm də ticarət və istehsalla məşğul olduğunu göstərir.

Tapılan əşyaların miqyası o qədər böyükdür ki, ümumi kolleksiyanın təxminən 22 min kisəni dolduracaq həcmdə olduğu bildirilir. Alimlər bu tapıntını Bohemiya bölgəsində indiyədək aşkar edilmiş ən böyük arxeoloji kəşflərdən biri hesab edirlər.

Mənbə: Halk TV / Sözcü