Apple-ın qarışıq reallıq eynəyi Vision Pro-nun tibbdə istifadəsi ilə bağlı yeni araşdırmanın nəticələri açıqlanıb. Araşdırmaya görə, cihaz cərrahi əməliyyatların müddətini təxminən 19 faiz azalda bilər.

Ənənəvi əməliyyat otaqlarında cərrahlar endoskopik kameradan gələn görüntüləri izləmək üçün qarşı tərəfdə yerləşən monitorlara baxmalı olurlar. Apple Vision Pro isə bu görüntüləri birbaşa həkimin baxış sahəsinə gətirərək əməliyyat zamanı daha rahat işləməyə imkan verir.

Araşdırma çərçivəsində gözyaşı kanallarının açılması ilə bağlı 32 endoskopik əməliyyat təhlil edilib. Əməliyyatların bir hissəsində cərrahlar adi monitorlardan, digər hissəsində isə Apple Vision Pro-dan istifadə ediblər.

Nəticələrə əsasən, Vision Pro istifadə edən həkimlərdə orta əməliyyat müddəti 34,4 dəqiqə olub. Ənənəvi monitorlardan istifadə edən qrupda isə bu göstərici 42,7 dəqiqə təşkil edib. Beləliklə, cihaz əməliyyat müddətində təxminən 19 faizlik azalma göstərib.

Araşdırmada hər iki qrupdakı əməliyyatların uğurla tamamlandığı və təhlükəsizlik baxımından ciddi fərq müşahidə edilmədiyi bildirilib. Tədqiqatda iştirak edən cərrahlar Vision Pro-nun həm fiziki, həm də zehni yükü azaltdığını qeyd ediblər.

Mütəxəssislər bildirirlər ki, Apple Vision Pro böyük monitor sistemlərinə alternativ ola bilər. Bununla belə, texnologiyanın tibbdə geniş tətbiqi üçün daha böyük miqyaslı və çoxmərkəzli araşdırmalara ehtiyac var.

Apple Vision Pro daha əvvəl də müxtəlif əməliyyatlarda istifadə olunub. Cihazın əsas üstünlüyü həkimlərə əməliyyat zamanı üçölçülü görüntülər, məlumatlar və xüsusi tibbi proqramlar vasitəsilə əlavə dəstək verməsidir.

Mənbə: Webtekno