Süd Yolu qalaktikasında sarımtıl-yaşıl görünüşü ilə diqqət çəkən ağ cırtdan ulduz aşkarlanıb. WD J1330+6435 adlanan bu ulduz qalığının qeyri-adi rəngi atmosferinə qarışan planet qalıqları ilə əlaqələndirilir.

XeberPlus.com xəbər verir ki, “RAS Techniques and Instruments” jurnalında dərc olunan araşdırmaya əsasən, Əjdaha bürcü istiqamətində yerləşən ağ cırtdanın rənginə atmosferindəki kimyəvi proseslər təsir edir.

Alimlərin araşdırmasına görə, keçmiş planet sistemindən qalan qayalıq materiallar ulduzun xarici qatlarına qarışıb. Həmin maddələrin tərkibindəki natrium sıx atmosferdə heliumla qarşılıqlı təsirə girərək işığın udulmasını dəyişdirir. Nəticədə ağ cırtdan sarımtıl-yaşıl görünüş alır.

Araşdırmada Yerə təxminən 65 işıq ili məsafə daxilində yerləşən 151 ağ cırtdanın rəngləri təhlil edilib. Karbonla zəngin bəzi ağ cırtdanların isə çəhrayı və bənövşəyi çalarlarda görünə bildiyi müəyyənləşdirilib.

Ağ cırtdanlar Günəşə bənzər ulduzların ömrünün sonunda geridə qalan sıx nüvələridir. Tədqiqat onların rəngini müəyyənləşdirərkən temperaturla yanaşı, atmosferin kimyəvi tərkibinin də nəzərə alınmalı olduğunu göstərir.

Alimlər gələcək müşahidələrlə daha çox yaşıl görünüşlü ağ cırtdanın müəyyən edilə biləcəyini düşünürlər.