Robot texnologiyalarının tibbdə istifadəsi sürətlə artır. Süni intellekt, naviqasiya sistemləri və teletibb imkanları ilə inkişaf edən robotik cərrahiyyə daha mürəkkəb əməliyyatların aparılmasına şərait yaradır.

XeberPlus.com xəbər verir ki, dünyada indiyədək 20 milyondan çox robotik cərrahiyyə əməliyyatı həyata keçirilib. Hazırda ABŞ, Çin, Yaponiya, Hindistan və Avropa ölkələri bu sahədə yeni texnologiyalar üzərində çalışır.

Robotik sistemlərdə həkim xüsusi konsol vasitəsilə robot qollarını idarə edir. Böyüdülmüş üçölçülü görüntü sayəsində cərrah əməliyyat sahəsini daha dəqiq görür və daha kiçik kəsiklərlə mürəkkəb müdaxilələr həyata keçirə bilir.

Süni intellektin robotik cərrahiyyəyə əlavə olunması ilə sistemlər toxumaları analiz etmək, həkimə əməliyyat zamanı dəstək vermək və daha dəqiq qərarlar qəbul etməyə kömək etmək imkanına malik olur.

Mütəxəssislər bildirirlər ki, gələcəyin əsas istiqamətlərindən biri uzaqdan idarə olunan əməliyyatlar olacaq. Hazırda bu sahədə müəyyən sınaqlar aparılsa da, geniş tətbiq üçün əlavə texniki və təhlükəsizlik araşdırmalarına ehtiyac var.

Alimlərin fikrincə, robotik cərrahiyyə gələcəkdə tibbin mühüm hissəsinə çevrilərək xəstələrin daha keyfiyyətli müalicə almasına və dünyanın müxtəlif bölgələrində ixtisaslı həkimlərə çıxış imkanlarının artmasına kömək edə bilər.