ABŞ Mərkəzi Kəşfiyyat İdarəsinin keçmiş yüksək vəzifəli əməkdaşı David J. Rush dövlət vəsaitlərindən şəxsi məqsədləri üçün istifadə etməklə bağlı ittiham üzrə günahını etiraf edib. İstintaq zamanı onun evindən yüzlərlə qızıl külçə, milyonlarla dollar nağd pul və bahalı saatlar aşkarlanıb.

XeberPlus.com xəbər verir ki, 49 yaşlı Rush Virciniya ştatında keçirilən məhkəmədə elektron fırıldaqçılıq maddəsi üzrə özünü təqsirli bilib. Bu ittiham üzrə onu maksimum 20 il həbs cəzası gözləyə bilər.

ABŞ Ədliyyə Nazirliyinin məlumatına görə, Rush saxta və “yüksək məxfi” hökumət proqramı yaradaraq Floridada lüks daşınmaz əmlakların alınmasına şərait yaradıb. Bundan başqa, onun başqa bir saxta “həssas hökumət fəaliyyəti” adı altında 40 milyon dollardan çox dəyəri olan yüzlərlə qızıl külçəni əldə etdiyi bildirilir.

Prokurorların hesablamalarına görə, Rushun fəaliyyəti federal hökumətə ümumilikdə təxminən 194 milyon dollar zərər vurub. Bu məbləğə onun şəxsi məqsədləri üçün dövlət hesabına təşkil etdiyi 1,8 milyon dollardan artıq çarter uçuşları da daxildir.

İstintaq zamanı onun Virciniyadakı evində təxminən 300 qızıl külçə, 2 milyon dollara yaxın nağd pul və 35-ə yaxın lüks saat müsadirə edilib. Bundan əvvəl prokurorlar evdə saxlanılan qızıl külçələrin ümumi dəyərinin təxminən 46 milyon dollar olduğunu bildirmişdilər.

Məhkəmə sənədlərində Rushun təhsili və hərbi fəaliyyəti barədə də yalan məlumatlar verdiyi qeyd olunur. Onun özünü ABŞ Hərbi Dəniz Qüvvələrinin keçmiş pilotu, həmçinin Clemson Universiteti və Rensselaer Politexnik İnstitutunun məzunu kimi təqdim etdiyi, lakin istintaqın bu məlumatları təsdiqləmədiyi bildirilir.

Rushun cəzasının 28 yanvar 2027-ci ildə Virciniya ştatının Aleksandriya şəhərində keçiriləcək məhkəmə iclasında elan olunması planlaşdırılır.