2025-ci ildə günəş enerjisi qlobal elektrik istehsalında ilk dəfə nüvə reaktorlarından daha çox paya sahib olub. Yeni hesabatlara görə, külək enerjisi də əlavə edildikdə, bu iki bərpa olunan enerji mənbəyinin istehsalı nüvə elektrik stansiyalarını iki dəfədən çox üstələyib.
XeberPlus.com xəbər verir ki, Dünya Nüvə Sənayesinin 2026-cı il hesabatına əsasən, günəş enerjisindən əldə edilən elektrik istehsalı 2025-ci ildə 30 faiz artıb. Külək enerjisində artım 8 faiz olduğu halda, nüvə enerjisində bu göstərici cəmi 1 faiz təşkil edib.
Hesabatda qeyd olunur ki, nüvə enerjisinin qlobal elektrik istehsalındakı payı 9 faizdən 8,8 faizə düşüb. Bu göstərici son 45 ilin ən aşağı səviyyəsi hesab olunur. 1996-cı ildə isə nüvənin qlobal elektrik istehsalındakı payı 17,5 faiz təşkil edirdi.
Hesabata görə, Çin nüvə enerjisini genişləndirən əsas ölkələrdən biri olsa da, yeni günəş enerjisi güclərinin artırılmasında daha sürətli irəliləyib.
Mütəxəssislər bildirirlər ki, Çin 2025-ci ildə nüvə enerjisi gücündəki artımdan təxminən 120 dəfə çox yeni günəş enerjisi gücü istifadəyə verib. Çin və Hindistan birlikdə bu gün nüvə stansiyalarından əldə etdikləri elektrikdən dəfələrlə çox elektrik enerjisini külək və günəş mənbələrindən istehsal edir.
2025-ci ildə dünyada istifadəyə verilən yeni nüvə reaktorlarının sayı bağlanan reaktorların sayından az olub. Həmin il 12 yeni reaktorun tikintisinə başlanılıb, bunların 9-u Çində, 2-si isə Rusiyada yerləşir.
Hesabat müəllifləri qeyd edirlər ki, Rusiya xarici ölkələrdə nüvə stansiyalarının tikintisi və nüvə yanacağı təchizatında mühüm rolunu qoruyur. Lakin bəzi beynəlxalq məhdudiyyətlər və sanksiyalar səbəbilə Rusiyanın xaricdəki layihələrində gecikmələr yaşandığı bildirilir.
Araşdırmada Çin, Fransa, Macarıstan, Yaponiya, Rusiya, Cənubi Koreya, İsveç, Ukrayna, Böyük Britaniya və ABŞ daxil olmaqla bir çox ölkənin nüvə enerji proqramları təhlil edilib.
Mütəxəssislərin fikrincə, enerji bazarında əsas dəyişiklik artıq yalnız enerji istehsalının həcmi ilə deyil, yeni texnologiyaların qurulma sürəti ilə də müəyyən olunur. Günəş və külək enerjisinin sürətli inkişafı qlobal enerji sistemində yeni mərhələnin başladığını göstərir.
