Ukrayna Prezidenti Volodimir Zelenski Rusiyanın Ukraynaya qarşı hava hücumlarında əvvəlki məhdudiyyətlərin aradan qaldırıldığını iddia edib.

XeberPlus.com xəbər verir ki, Zelenski “Financial Times” qəzetinə açıqlamasında bu məlumatın Ukrayna kəşfiyyatının Kreml daxilindəki yazışmalardan əldə etdiyi məlumatlara əsaslandığını bildirib.

Zelenskinin sözlərinə görə, Rusiya Prezidenti Vladimir Putin sentyabr ayında hərbi rəhbərliyə hücumlarla bağlı əvvəlki məhdudiyyətləri ləğv etmək barədə göstəriş verib. O, bu qərardan sonra Kiyev və digər böyük şəhərlərə qarşı hava hücumlarının artdığını iddia edib.

Ukrayna tərəfi bildirib ki, son dövrdə məktəblər, xəstəxanalar, telekommunikasiya mərkəzləri və məlumat sistemləri kimi obyektlər daha çox təhlükə altında ola bilər.

Lakin bu iddialar müstəqil mənbələr tərəfindən təsdiqlənməyib. Kremlin sözçüsü Dmitri Peskov isə Rusiya ordusunun məktəb və xəstəxanalar kimi mülki obyektləri hədəf alması ilə bağlı ittihamları rədd edib.

Müharibə ilə bağlı qarşılıqlı ittihamlar davam edərkən, tərəflərin açıqlamalarının müstəqil şəkildə yoxlanmasının çətin olduğu bildirilir.