Instagram və Facebook-un sahibi olan Meta şirkəti uşaqların psixi sağlamlığına və təhlükəsizliyinə vurduğu zərərlə bağlı ABŞ-da böyük məbləğdə maliyyə öhdəliyi ilə üzləşib. Nyu-Meksiko ştatında məhkəmənin son qərarı ilə şirkətin ödəməli olduğu ümumi məbləğ 942 milyon dollara çatıb.

Məhkəmənin qərarına əsasən, Meta əlavə olaraq 567 milyon dollar ödəməlidir. Bundan əvvəl, 2026-cı ilin martında keçirilən məhkəmə prosesində şirkətə 375 milyon dollar məbləğində cərimə tətbiq edilmişdi. Beləliklə, iki qərar üzrə ümumi məbləğ 942 milyon dollar təşkil edir.

Nyu-Meksiko məhkəməsi Meta-nın platformalarında uşaqların təhlükəsizliyinin lazımi səviyyədə qorunmadığı, gənc istifadəçilərin zərərli və asılılıq yarada bilən funksiyaların təsirinə məruz qaldığı qənaətinə gəlib. İş çərçivəsində uşaqların onlayn istismar risklərindən qorunması məsələsi də əsas müzakirə mövzularından biri olub.

Yeni qərarla ayrılacaq vəsaitin böyük hissəsinin yeniyetmələrin psixi sağlamlığının qorunmasına yönələn xidmətlərə sərf olunması nəzərdə tutulur. Digər vəsaitlər isə maarifləndirmə, profilaktika və uşaqların sosial şəbəkələrdə daha təhlükəsiz fəaliyyət göstərməsi üçün nəzərdə tutulan tədbirlərə yönəldiləcək.

Məhkəmə Meta-dan yalnız maliyyə ödənişi tələb etməyib. Şirkətin gənc istifadəçilərin qorunması üçün yaşın müəyyənləşdirilməsi sistemlərini gücləndirməsi, yeniyetmələrin platformalardan istifadə müddətinə müəyyən məhdudiyyətlər tətbiq etməsi və təhlükəli məzmunla bağlı əlavə qoruyucu tədbirlər görməsi də nəzərdə tutulur.

Meta isə məhkəmənin qərarı ilə razılaşmadığını və apellyasiya şikayəti verəcəyini açıqlayıb. Şirkət nümayəndələri platformalarda istifadəçilərin təhlükəsizliyinin təmin olunması və zərərli məzmunun aşkarlanaraq silinməsi istiqamətində uzun müddətdir çalışdıqlarını bildiriblər.

Mütəxəssislər Nyu-Meksikoda qəbul edilən qərarın ABŞ-ın digər ştatlarında sosial media şirkətlərinə qarşı aparılan məhkəmə proseslərinə də təsir göstərə biləcəyini düşünürlər. Hazırda ölkənin müxtəlif bölgələrində sosial şəbəkələrin uşaqlar və yeniyetmələrə təsiri ilə bağlı çoxsaylı hüquqi proseslər davam edir.

Uşaqların sosial şəbəkələrdən istifadəsinə məhdudiyyət tətbiq edən ölkələrin sayı da artır. Dünyanın bir sıra başqa ölkələrində də uşaqların sosial platformalarda qorunması məqsədilə yaş yoxlaması və valideyn nəzarəti kimi tədbirlər gücləndirilir.

Mənbə: Haber7.com