Azərbaycan muğamının elə səsləri var ki, illər keçsə də yaddaşlardan silinmir. Yaqub Məmmədov da həmin unudulmaz sənətkarlardan biridir. Onun ifasında muğam yalnız musiqi deyil, həm də dərin duyğuların, Qarabağ ruhunun və Azərbaycan poeziyasının ifadəsinə çevrilirdi.

Yaqub Məhəmməd oğlu Məmmədov 1930-cu il mayın 5-də Ağcabədi rayonunda dünyaya gəlib. Uşaqlıqdan musiqiyə böyük maraq göstərən xanəndənin sənət yolunun formalaşmasında Qarabağ muğam mühiti mühüm rol oynayıb.

O, Azərbaycan Dövlət Musiqi Məktəbində təhsil alıb və burada böyük xanəndə Seyid Şuşinskidən muğam sənətinin incəliklərini öyrənib. Müəllimindən aldığı sənət dərsləri onun gələcək yaradıcılığında mühüm iz buraxıb.

Yaqub Məmmədovun səsi xüsusilə muğam ifalarındakı emosional dərinliyi ilə seçilirdi. “Çahargah”, “Segah”, “Rast”, “Zabul” kimi muğamları özünəməxsus şəkildə ifa edən xanəndə xalq mahnıları və təsnifləri də böyük ustalıqla səsləndirib.

1958-ci ildən Azərbaycan Dövlət Filarmoniyasında solist kimi fəaliyyət göstərən sənətkarın ifaları müxtəlif illərdə lentə alınıb. Onun səsi Azərbaycanın sərhədlərindən kənarda da tanınıb. Sanki muğam onun səsində yeni bir nəfəslə doğulmuşdu. Onun ifasında səslənən muğamlar həmişəlik qızıl fonda daxil olub.

Yaqub Məmmədovun sənətinin əsas xüsusiyyətlərindən biri muğamı sadəcə oxumaq deyil, onu yaşatmaq bacarığı idi. Onun ifasında hər bir muğam parçası özünəməxsus ovqat qazanır, xanəndənin səsi dinləyicidə dərin hisslər oyadırdı.

Böyük sənətkar 2002-ci il iyunun 5-də Bakıda vəfat edib. Aradan illər keçməsinə baxmayaraq, Yaqub Məmmədovun ifaları bu gün də dinlənilir. Onun səsi lent yazılarında, muğam həvəskarlarının yaddaşında və Azərbaycan musiqi tarixində yaşamaqda davam edir və edəcək.

Yaqub Məmmədov Azərbaycan xanəndəlik məktəbinin yetişdirdiyi sənətkarlardan biri kimi muğam tarixində özünəməxsus iz qoyub. Onun adı çəkiləndə isə yaddaşlarda ilk növbədə güclü, kövrək və ruh oxşayan bir muğam səsi canlanır.