Adətən zibil hesab edilən minlərlə süd şüşəsi bu dəfə yol tikintisində istifadə olunub. Çin alimləri və şirkətlər plastik tullantıları xüsusi texnologiya ilə emal edərək asfaltın tərkibinə əlavə ediblər.
Şanxaydakı Şərqi Çin Elm və Texnologiya Universitetinin kampusunda salınan 300 metrlik yolun hazırlanmasında 6 mindən çox istifadə olunmuş süd şüşəsindən əldə edilən 200 kiloqramdan artıq plastik material istifadə edilib.
Maraqlısı isə odur ki, bu şüşələr adi plastiklər kimi asanlıqla geri çevrilə bilmirdi. Səbəb isə içərisində qalan süd qalıqlarının emal prosesini çətinləşdirməsi idi. Yeni texnologiya sayəsində həmin plastiklər xüsusi emal olunaraq asfaltın möhkəmləndirilməsində istifadə edildi.
Mütəxəssislər hesab edir ki, belə layihələr həm plastik tullantıların azalmasına, həm də daha davamlı yolların hazırlanmasına kömək edə bilər.
Bu layihə 2030-cu ilə qədər 1 milyon ton plastik tullantının yenidən istifadəyə qazandırılması məqsədinin bir hissəsidir. Oxşar plastik asfalt layihələri artıq İndoneziya, Hindistan və Taylandda da sınaqdan keçirilib.
