“Samsung” şirkətinin 2027-ci ildə təqdim edəcəyi gözlənilən “Galaxy S27 Ultra” modelinin dizaynı ilə bağlı yeni görüntülər yayılıb.
XeberPlus.com xəbər verir ki, yeni görüntülər avqust ayında yayımlanan kompüter əsaslı (CAD) çertyojlar əsasında hazırlanmış fiziki maketə aiddir.
Maketin “Galaxy S26 Ultra”, “iPhone 18 Pro” və “Google Pixel 11 Pro” modelləri ilə müqayisə edildiyi görüntülər də paylaşılıb. Bununla belə, maketin daxilində ekran, batareya və digər elektron hissələr yoxdur. Buna görə də görüntülər yalnız cihazın mümkün xarici görünüşü barədə təsəvvür yaradır.
Məlumata əsasən, “Galaxy S27 Ultra”nın ölçüləri 163,76 × 78,25 × 7,97 millimetr olacaq. Əvvəlki “Galaxy S26 Ultra” modelinin ölçüləri isə 163,6 × 78,1 × 7,9 millimetrdir. Bu göstəricilər yeni modelin ölçülərində ciddi dəyişiklik gözlənilmədiyini göstərir.
Telefonun ön hissəsində kamera üçün ekranın yuxarı mərkəzində kiçik dəlik yerləşir. Səs və enerji düymələri əvvəlki kimi sağ tərəfdə saxlanılıb. Alt hissədə isə USB-C girişi, SIM kart yuvası, mikrofon, dinamik və “S Pen” qələmi üçün bölmə yer alır.
Əsas dəyişikliklərin arxa kamera hissəsində olacağı bildirilir. Yeni modeldə kamera blokunun dizaynı yenilənə və əvvəlki modellə müqayisədə kamera sensorlarının sayı azaldıla bilər.
Digər diqqətçəkən yenilik isə maqnitli aksesuar dəstəyidir. İddialara görə, “Galaxy S27 Ultra” “Apple”ın “MagSafe” texnologiyasına bənzər sistemlə təchiz oluna bilər. Bu, maqnitli enerji doldurma qurğularından və müxtəlif aksesuarlardan istifadəni asanlaşdıra bilər.
