Laboratoriyada yetişdirilən miniatür insan beyni modelləri Beynəlxalq Kosmik Stansiyaya çatdırılıb. Alimlər bu nümunələr vasitəsilə kosmos şəraitinin beyin hüceyrələrinə necə təsir etdiyini araşdıracaqlar.

XeberPlus.com xəbər verir ki, nümunələr “SpaceX” şirkətinin 35-ci kommersiya təchizat missiyası çərçivəsində stansiyaya göndərilib. Kosmik gəmidə ümumilikdə təxminən 2 860 kiloqram elmi avadanlıq və müxtəlif tədqiqat materialları olub.

Tədqiqatın əsas məqsədi mikroqravitasiya və kosmik radiasiyanın beyin hüceyrələrində yaratdığı dəyişiklikləri öyrənməkdir. MiBrains adlanan üçölçülü miniatür modellər təxminən beş həftə kosmosda saxlanılacaq, daha sonra isə Yer üzündə eyni şəraitdə qorunan nümunələrlə müqayisə ediləcək.

Alimlər araşdırma nəticəsində hüceyrə və gen səviyyəsində baş verən dəyişiklikləri müəyyənləşdirməyə çalışacaqlar. Əldə ediləcək məlumatların insanın qocalması və nevroloji xəstəliklərlə bağlı proseslərin daha yaxşı anlaşılmasına kömək edəcəyi gözlənilir.

Tədqiqat gələcəkdə Aya və Marsa uzunmüddətli uçuşlar zamanı astronavtların beyin sağlamlığının qorunması baxımından da əhəmiyyətlidir. Kosmosda uzun müddət qalmağın insan orqanizmində müxtəlif dəyişikliklər yaratdığı məlumdur və alimlər bu təsirləri daha dərindən öyrənmək istəyirlər.