Bəzən insan illər sonra məktəbin qarşısından keçir və bir anlıq uşaqlıq illərinə qayıdır. Sinif otağının qoxusu, lövhədə yazılan ilk hərflər, müəllimin səsi, partanın arxasında keçən günlər… O vaxt adi görünən bütün bunlar illər keçdikcə insanın ən qiymətli xatirələrinə çevrilir. Çünki müəllim bizə yalnız dərs öyrətmir, həyatımızın bir parçasını da özü ilə aparır.

5 Oktyabr Beynəlxalq Müəllimlər Günü sadəcə müəllimləri təbrik etdiyimiz bir tarix deyil. Bu gün bizə ilk dəfə əlimizdən tutub yazmağı öyrədən, səhvimizi düzəldən, bacarmadığımız zaman “sən bacararsan” deyən insanları xatırladır.

Bəzən bir müəllimin dediyi tək bir cümlə illərlə insanın yaddaşından silinmir. Bəlkə də həmin müəllim heç vaxt bilməyəcək ki, vaxtilə söylədiyi bir söz şagirdinin özünə inanmasına, qorxusunu aşmasına, yolunu seçməsinə səbəb olub. Çünki müəllimlərin həyatımıza qoyduğu iz hər zaman dərsliklərdə görünmür.

Müəllim bəzən öz övladından əvvəl şagirdinin uğuruna sevinir. İmtahan nəticəsini gözləyərkən, universitetə qəbul xəbərini eşidərkən, illər sonra şagirdinin uğurunu görəndə çəkdiyi zəhmətin bəhrəsini hiss edir. Şagird isə böyüyüb məktəbdən uzaqlaşdıqca bir həqiqəti daha yaxşı anlayır, bəzi insanların qiymətini onların yanında olarkən deyil, uzaqlaşdıqdan sonra anlayırıq.

İllər keçir. Şagird böyüyür, başqa şəhərlərə gedir, başqa insanlarla tanış olur, yeni həyat qurur. Amma bir gün keçmiş müəlliminə rast gələndə yenə özünü həmin sinifdə oturan uşaq kimi hiss edir. Müəllimin “sən bunu bacararsan” deyən səsi sanki illərin o tayından yenidən eşidilir.

Bəlkə də müəllimlik elə budur, bir insanın həyatından keçib onun yaddaşında ömürlük qalmaq.

Bu gün məktəbdə siniflərin qarşısında dayanan, illərdir minlərlə uşağın həyatına toxunan bütün müəllimlərə təşəkkür edirik. Bizim ilk uğurlarımızda onların zəhməti, ilk səhvlərimizdə onların səbri, gələcəyə inamımızda isə onların sözləri var.

Bəzi insanlar həyatımıza gəlir və gedir. Müəllimlər isə həyatımızdan keçib yaddaşımıza çevrilirlər.

5 Oktyabr bütün müəllimlərin günü mübarək!