Yeni dərs ilinin başlaması ilə uşaqların gündəlik həyatında kitab, dəftər, elektron lövhə, kompüter, planşet və telefonla keçirilən vaxt artır. Uzun müddət yaxın məsafəyə baxmaq isə gözlərin daha çox yüklənməsinə səbəb ola bilər.

XeberPlus.com bildirir ki, Xüsusilə uşaqlıq və yeniyetməlik dövründə görmə qabiliyyətinə diqqət yetirmək vacibdir. Son illərdə uşaqlarda uzağı aydın görə bilməmə – miyopiyanın yayılması da valideynləri bu məsələyə daha həssas yanaşmağa vadar edir.
Mütəxəssislər uşağın kitab və ya ekran qarşısında fasiləsiz qalmasının qarşısının alınmasını tövsiyə edirlər. Bunun üçün 20-20-20 qaydasından istifadə etmək olar: hər 20 dəqiqədən bir ən azı 20 saniyə ərzində təxminən 6 metr uzaqdakı bir obyektə baxmaq gözlərin dincəlməsinə kömək edir. Kitab və elektron cihazların gözə həddindən artıq yaxın tutulmaması, düzgün işıqlandırmada oxunması və uşağın dərs zamanı düzgün oturması da əhəmiyyətlidir.
Göz sağlamlığının qorunmasında açıq havada keçirilən vaxt da xüsusi yer tutur. Uşağın gün ərzində daha çox çöldə olması yalnız fiziki aktivliyi artırmır, həm də miyopiyanın yaranması və inkişafının qarşısının alınmasına kömək edə bilər. Buna görə məktəbdən sonra bütün vaxtı telefon və planşet qarşısında keçirməkdənsə, uşağın gəzməsi, oynaması və açıq havada vaxt keçirməsi daha faydalıdır.
Valideynlər uşağın davranışındakı dəyişikliklərə də diqqət yetirməlidirlər. Uşaq lövhədə yazılanları görmək üçün gözlərini qıyırsa, televizora və ya telefona həddindən artıq yaxınlaşırsa, kitabı üzünə yaxın tutursa, tez-tez gözlərini ovuşdurur və ya oxuyarkən baş ağrısından şikayətlənirsə, bu, görmə probleminin əlaməti ola bilər. Belə hallarda problemi təxirə salmadan göz həkiminə müraciət etmək vacibdir. Çünki uşaqlar bəzən görmələrinin zəiflədiyini özləri fərq etməyə bilirlər.
Məsələ yalnız valideynlərin nəzarəti ilə də bitmir. Məktəblərdə sinif otaqlarının kifayət qədər işıqlandırılması, lövhədəki yazıların aydın görünməsi, dərs zamanı fasilələrin verilməsi və tənəffüslərdə uşaqların hərəkət etməsi də gözlərin həddindən artıq yüklənməsinin qarşısını almağa kömək edə bilər. Beləliklə, yeni dərs ilinə hazırlıq zamanı məktəbli çantası və dərs ləvazimatları qədər uşağın görmə sağlamlığı da diqqətdə saxlanmalıdır.