İnternet üzərindən alış-veriş artıq gündəlik həyatın adi hissəsinə çevrilib. Bəzən insan ehtiyacı olmayan bir məhsulu belə səbəbsiz yerə səbətə əlavə edir və “onsuz da lazım olacaq” düşüncəsi ilə alış-verişi tamamlayır. Əslində isə bunun arxasında yalnız məhsulun cəlbediciliyi deyil, alıcıya təsir edən müxtəlif psixoloji üsullar dayanır.

Onlayn mağazalarda ən çox istifadə olunan üsullardan biri “son 2 məhsul qalıb”, “endirimə 1 saat qalıb” kimi mesajlardır. Belə ifadələr insanda məhsulu itirmək qorxusu yaradır. Alıcı düşünür ki, indi qərar verməsə, daha sonra həmin məhsulu əldə edə bilməyəcək. Buna görə də normalda almayacağı məhsulu tələsik sifariş verir. Məsələn, məhsulun əvvəlki qiyməti 100 manat, indiki qiyməti isə 70 manat göstərildikdə, alıcı 30 manat qənaət etdiyini düşünür. Halbuki həmin məhsula ümumiyyətlə ehtiyacı olub-olmadığı ikinci plana keçir. Yəni diqqət məhsulun qiymətindən çox “qənaət edilən məbləğə” yönəlir.

Geri sayımlar və kampaniyalar alıcıya qərar vermək üçün az vaxtının qaldığını düşündürür. Bu zaman insan məhsul haqqında ətraflı düşünmək əvəzinə daha tez almaq qərarı verir. “20 nəfər satın aldı” kimi məlumatlar da alıcının qərarına təsir edə bilər. İnsanlar başqalarının seçimlərini təhlükəsiz və doğru seçim kimi qəbul etməyə meyllidirlər. Buna görə məhsula marağın çox olduğunu görmək həmin məhsulu daha cəlbedici göstərə bilər.

Bəzən isə məhsul rəyləri xüsusi əhəmiyyət daşıyır. Yüzlərlə müsbət rəy görən alıcı məhsula daha çox etibar edə bilər. Xüsusilə “ən çox satılan” kimi ifadələr məhsulun digərlərindən daha yaxşı olduğu təsəvvürünü yarada bilər.

Bundan başqa, onlayn mağazalar istifadəçinin əvvəlki axtarışlarına və baxdığı məhsullara əsasən ona uyğun təkliflər göstərə bilir. Beləliklə, insanın qarşısına maraq dairəsinə uyğun məhsullar daha çox çıxır və alış-veriş etmək ehtimalı artır.

Bütün bunlar göstərir ki, onlayn alış-verişdə qərarlarımız həmişə yalnız ehtiyaclarımız əsasında formalaşmır. Endirim, vaxt məhdudiyyəti, digər insanların rəyləri seçimlərimizə ciddi təsir göstərə bilir.